Проводы в школу

Создано: 10.06.2020, обновлено: 10.06.2020

Бүгүн «Кустук» уһуйаан оскуолаҕа барар оҕолорун тэйиччиттэн олорон атаардылар. Атаарыы телевизионнай передача курдук сценарийданан ыытылынна. Уһуйааҥҥа 4-5 сыл устата тэйбэккэ сылдьыбыт кырачаан иитиллээччилэрин төһө да тэйиччиттэн олорон атаардаллар иитээччилэрэ олус долгуйдулар.

Быйыл «Кустук» уһуйаан аанын сабан атаарыллар оҕолор бииртэн-биир уратылаах, дьоҕурдаах оҕолор буолалларын иитээччилэрэ Ирина Васильевна Терехова тоһоҕолоон бэлиэтээн туран оҕо аайы уратыларынан көрөн анал ааттары анаталаата. Онтон бу оҕолортон уһулуччулаах Попова Алия уонна Ефимова Дарьяна «Сыл бастыҥ выпускнига» ааты ыллылар.

Кустукка үтүө үгэһинэн бу тэрээһиҥҥэ «Сыл бастыҥ дьиэ кэргэнэ» аат иҥэриллээччи. Бу анал аат хаһаайыттарынан буоллулар  уһуйаан иитэр-үөрэтэр үлэтигэр сүбэ-ама буолар уонна ыытыллар тэрээһиннэргэ оҕолорун өрүү кытыннарар, күүс-көмө буолар Александр Давидович уонна Саргылана Николаевна Поповтар дьиэ кэргэттэрэ.

Тэрээһиҥҥэ салгыы сэбиэдиссэй Марианна Яковлевна Григорьева оскуолаҕа барар оҕолору, төрөппүттэри эҕэрдэлээтэ, махтал суруктары туттартаата. Уонна уһуйаан исписэлиистэригэр, иитээччилэригэр махтал суруктарын туттарда.

Төрөппүттэр Саргылана Николаевна Попова, Ольга Николаевна Попова уһуйааннарыгар махталларын биллэрдилэр.

Тэрээһин видеоҕа уһуллан, монтажтанан оҕолор хаартыскалара түмүллүбүт дискаларга килэриллэн, тарҕанан оҕолорго үйэ-саас тухары үтүө өйдөбүл буолуоҕа.

Татьяна Максимова-Лазарева
Кэбээйи сэл.